Humanistskolen skal vurderast på nytt

Humanistskolen søkte KD om godkjenning som privatskole. Men departementet avviste søknaden, og kom med ei vurdering som tilsa at det ikkje var heimel for å godkjenne sekulære livssynsskolar etter vilkåret «religiøst» i privatskolelova § 2-1 andre ledd bokstav a).

Departementet innhenta og ei utgreiing frå lovavdelinga i Justisdepartementet der det vart konstatert at det ikkje kan utelukkast at eit sekulært livssyn vil vere omfatta av privatskolelova.

Brot på diskrimineringslova

Likestillings- og diskrimineringsombodet konkluderte med at avslaget frå KD medførte at KD handla i strid med diskrimineringslova § 4.

Ombodet la vekt på uttala frå Justisdepartementet, samt det Tru- og livssynsutvalet skreiv i si offentlege utgreiing om denne saka, nemleg at utvalet ikkje kan sjå det som sakleg og naudsynt å la vere og vurdere søknaden frå Humanistskolen. LDO oppfordra derfor Utdanningsdirektoratet og Kunnskapsdepartementet til å vurdere søknaden på nytt.

Departementet har no lova å sjå på saka ein gong til, og ber Utdanningsdirektoratet om å vurdere søknad om godkjenning på nytt.