Set kvinners arbeidshelse på agendaen
Kvinnearbeidshelseutvalet leverte rapporten sin våren 2025. Dei kom mellom anna fram til at samfunnet taper 59 milliardar kroner årleg på grunn av kvinners langtidssjukefråvær. Ombodet har sendt sine innspel. Det vidare arbeidet vil handle om korleis vi kan få tiltak ut i praksis på den enkelte arbeidsplass.
Solid kunnskapsgrunnlag
For første gong har vi fått ei utgreiing (NOU) som systematisk går gjennom kunnskap om kvinners arbeidshelse. Spørsmålet er: Korleis kan vi førebyggje sjukefråvær, styrkje arbeidshelsa og hindre fråfall frå arbeidslivet? Utvalet gir oss eit solid grunnlag og foreslår 47 gode og viktige tiltak.
Våre erfaringar
Kvart år får LDO om lag 2400 førespurnader til rettleiingstenesta vår. Omtrent halvparten av desse sakene handlar om diskriminering i arbeidslivet. Den største enkeltkategorien handlar om diskriminering på grunn av graviditet og foreldrepermisjon, inkludert manglande tilrettelegging på grunn av graviditet og amming. Vi får òg jamleg saker om seksuell trakassering i arbeidslivet. Alle desse temaa påverkar kvinners arbeidshelse.
Tydelige tilrådingar
Vi vil halde fram arbeidet vårt mot diskriminering i arbeidslivet, og meiner rapporten er ei viktig anerkjenning av utfordringane kvinnelege arbeidstakarar står overfor. Under følgjer ombodets tilrådingar for det vidare arbeidet:
• Spreie kunnskap om korleis arbeidsgivarar kan bruke aktivitets- og redegjersleplikta til å styrkje kvinners arbeidshelse og ta omsyn til ulike livsfasar.
• Styrkje det systematiske HMS-arbeidet i verksemdene med vekt på kvinners arbeidshelse.
• Sjå likestillings- og diskrimineringslova og arbeidsmiljølova i samanheng, og samordne arbeidslivet si innsats på desse områda.
• Leggje fram ein ny nasjonal arbeidsmiljøstrategi.
• Sikre eit forsvarleg arbeidsmiljø for kvinnelege arbeidstakarar med innvandrarbakgrunn.
• Førebyggje og handtere vald, truslar og trakassering i arbeidslivet.
• Etablere eit kompetansetilbod for arbeidslivet om vald i nære relasjonar.
No startar det viktige arbeidet med oppfølging, og vi vil bidra inn i dette arbeidet med kompetansen vår.
Webinar om kvinnehelse og arbeidsliv
Vil du lære meir om dette temaet? Kom på webinaret vårt Kvinnehelse og arbeidsliv: Korleis heng dette saman? den 2. desember kl. 09.30–11.00.
